بنت بنتي

أول م سمعت الخبر رجعت بذاكرتي لورا.. أفتكرت كل اللي سابونا الكام سنة اللي فاتت. جدتي من حوالي سنتين، عمتي في رمضان من سنتين، واتنين من أولادها من كام سنة، وجدي من حوالي 11 سنة.. وأخيراً عمتي سنة قبله.

أول م سمعت الخبر فكرت في أخويا محمد اللي عندو 4 سنين. محمد محضرش جدو، وجدتي مش هيفتكرها ولا مؤخراً، جدي التاني.

هاحكيلوا وهحكي لولادي عنه.

هحكيلهم عن كرسيه اللي قدام التلفزيون و المخدة في ضهره وواحدة تانية قاعد عليها. هحكيلهم إنه كان أكتر كرسي مريح في الدنيا ودايماً بيبقى دافي، قدامه ترابيزة صغيرة بيسند عليه رجليه وواحدة تانية جانبه عليها الجرنان أو الشاي.

هحكيلهم أنه كان بيحب يقرا وعنده كتب في كل حته في البيت، وكان دايما بيشتري مجلة العربي.

هحكيلهم أنه كتب شعر في وفاة الشعراوي، وفرح خالي ومناسبات كتير أنا مش فاكرها، هقرأ لهم شعره ورسائل مبعتهاش.

هحكيلهم عن الفراشة اللي رسمها على جرس شقتنا علشان ميتلخبطش، والنخلة اللي رسمها على الحيطة علشان مينساش اتجاه القبلة.

هحكيلهم أنه كان بيكره البيتزا علشان مكنش مقتنع بيها : “عجينة عليها شوية زتون” كان بيسميها كده.

-“جربها يا جدو” أمسك بقطعة بيتزا وجبتنها متسللة على أطرافها.

-يهز رأسه لأ.

هحكيلهم أنه كان بيكره عبدالناصر وحكم العسكر وانه كان شايف انه السبب في كل اللي احنا فيه، وكان بيكره مبارك أكتر واحد فيهم.

هحكيلهم عن الست الإيطالية اللي كانت بتديرهي وزوجها السكن اللي كان ساكن فيه في أيام الكلية، وإنه اتعلم منها أكلات إيطالية وأقنعها بالإسلام وأسلمت فعلاً.

هحكيلهم عن طمي النيل، موضوع جدي المفضل.

“مصر ماتت لما اتمنع عنها طمي النيل ببناء السد العالي”.

هحكيلهم أنه لما سأل مهندس من اللي اشتغلوا في السد العالي إن الخرسانة بتتماسك لأنها بتعمل بالورات ومش تفاعل كيميائي.

هحكيلهم عن يوم في أكتوبر 2012 لما احتفلنا بعيد ميلاده وعيد ميلادي وعيد ميلاد إبن خالي عندنا في البيت، أنا تميت 20, وإبن خالي تم 10 سنين وجدو تم80.

هحكيلهم أنه لما سألنا: حاسس بإيه وإنت عندك تمانين سنة؟

“أنا زي م أنا.”

هحكلهم إزاي مامتي واخدة طبعه، وأنا واخدة طبعها.

هحكيلهم عن مسكته لخدودي، ولما يبص في عيني ويقول: “بحبك يا بنت بنتي”.

الله يرحمك يا جدي.

كان نفسي مكنش بعيط وأنا بكتب البوست ده.. يمكن كنت افتكرت حاجات أكتر.. بس أكيد أكيد هحكلهم عنها.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s